ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានរំឭកដឹងគុណដល់ការលះបង់របស់សម្ដេចព្រះនរោត្តម សីហនុ ចំពោះជាតិមាតុភូមិក្នុងខួបនៃការសោយទីវង្គតរបស់ព្រះអង្គ និងសូមឲ្យព្រះអង្គស្ដេចយាងបដិសន្ឋិក្នុងព្រះបរមសុគតិភពកុំបីឃ្លាងឃ្លាត។
សម្តេចតេជោ ហ៊ុន សែន បានសរសេរនៅលើហ្វេសប៊ុកផេករបស់សម្ដេចថា៖ «នៅថ្ងៃនេះ ប្រជារាស្រ្តទូទាំងប្រទេស ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ សូមសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះ ព្រះបរមរតនកោដ្ឋ ដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា។ កូនចៅប្រជារាស្រ្តទូទាំងប្រទេស និងមន្រ្តីរាជការ សូមថ្វាយព្រះរាជកុសលព្រះវិញ្ញាណក្ខន្ឋព្រះបរមសព ព្រះករុណា ព្រះបាទសម្តេចព្រះ នរោត្តម សីហនុ សូមស្តេចយាងបដិសន្ឋិក្នុងព្រះបរមសុគតិភពកុំបីឃ្លាងឃ្លាតឡើយ»។
ព្រះបាទសម្តេចព្រះ នរោត្ដម សីហនុ បានយាងសោយទិវង្គត នៅថ្ងៃទី១៥ ខែតុលា ឆ្នាំ២០១២ នៅទីក្រុងប៉េកាំង ប្រទេសចិន រហូតមកដល់ពេលនេះមានរយៈពេល៩ឆ្នាំហើយ។ រាជរដ្ឋាភិបាលបានយកថ្ងៃនេះជាថ្ងៃបុណ្យជាតិមួយដើម្បីរំលឹកដឹងគុណដល់ការលះបង់របស់ព្រះអង្គសម្រាប់ជាតិកម្ពុជា៕
